ശുദ്ധാത്മാവേയെന്നെ പാപബോധം നീ വരുത്തി വീണ്ടും
ജനിപ്പിച്ചു എന്റെ ആത്മ ജീവനെ പാലിക്കുക

പല്ലവി

മാ ശുദ്ധാത്മാവിയേ സദാ ഞാൻ
അശുദ്ധമാം എന്നുള്ളത്തിൽ നിന്റെ
വാഴ്ത്തപ്പെട്ട വ്യാപാരങ്ങൾക്ക്
ഏല്പിച്ചിടുന്നേൻ എന്നെ

വേദത്തിൻ വചനം ഏറ്റം മാധുര്യകരമായ് തീർത്തു
ദൈവേഷ്ടമതിൽ നിന്നെന്നും എന്നെ അഭ്യസിപ്പിക്ക

എൻ ദുഖങ്ങളിലെല്ലാം നീ എന്നാശ്വാസപ്രദനാക
യേശുവിന്റെ മാർവിൽ ചാരി ആശ്വസിപ്പാൻ കൃപ താ

ദൈവത്തിൻ ഹിതപ്രകാരം ജീവനുള്ള പ്രാർത്ഥന ഞാൻ
എല്ലാനേരവും കഴിപ്പാൻ എന്നെ പഠിപ്പിക്കുക

എന്നിൽ നീ വസിച്ചു പാപം തന്നുടെ അടിമ നീക്കി
സ്വാതന്ത്ര്യത്തെ എനിക്കേകി ശുദ്ധമാക്ക നാൾക്കുനാൾ

യേശുവിൻ മഹിമയെയും സ്നേഹത്തിന്നളവിനെയും
എന്നിൽ നീ വെളിപ്പെടുത്തി തന്നരുൾക സർവ്വദാ

യേശുവിന്നു സാക്ഷിയായി ഞാൻ എന്നും ജീവിതം ചെയ്‌വാൻ
നിന്നുടെ പരമ ശക്തി എന്മേൽ ആവസിക്കട്ടെ

നിൻ ദിവ്യ ഫലങ്ങൾ എല്ലാം അൻപോടെ ഉളവാക്കെന്നിൽ
ഞാൻ യേശുവിന്നനുരൂപൻ അകേണമേ നാൾക്കുനാൾ